मुटुमा समस्या आएपछि ४८ घण्टादेखि बाँसबारी स्थित शहीद गंगालाल हृदय रोग
केन्द्रको सिसियु कक्षमा उपचारार्थ रहेका बरिष्ठ फिल्मकर्मी नीर शाहको
स्वास्थ्य अवस्थामा सुधार आएको छ । परिवारले दिएको जानकारी अनुसार शाहले आज
दिउँसोदेखि तरल पदार्थ पनि खान थालेका छन् ।
नीर शाहकी श्रीमती उषाका अनुसार दिउँसो जुस खान दिईएको थियो । यस्तै साँझ
जाउलो खान दिईएको उनले बताइन् । 'स्वास्थमा सुधार आउँदै छ,' उषाले
फिल्मीखबर समक्ष भनिन्, 'खानेकुरा खान थाल्नु भएको छ । त्यसैले अब ढुक्क
भयौं ।' शाहलाई अझै २४ घण्टा सिसियू कक्षमा नै राखिने बताईन् । डाक्टरले ७२
घण्टा सिसियू कक्षमा राख्न भनेको उनले बताईन् ।
आज साँझ नै राष्ट्रिय चलचित्र पुरस्कार वितरण समारोहमा उपस्थिती जनाएर
अभिनेता सौगात मल्ल, अभिनेत्रीद्धय केकी अधिकारी र प्रियंका कार्की,
निर्देशक तथा सेन्सर बोर्ड सदस्य सुरेश दर्पण पोखरेल, स्क्रिप्ट राईटर शान
बस्न्यात, कलाकार निलु डोल्मा शेर्पाको टोली गंगालाल पुगी शाहको स्वास्थ्य
अवस्थाको बारेमा जानकारी लियो । त्यसअघि बरिष्ठ कलाकार हरिहर शर्मा पनि
गंगालाल पुगेका थिए ।
नीर शाहको स्वास्थ्य अवस्था बुझ्न गंगालाल अस्पतालमा फिल्मकर्मीको
उपस्थिती बाक्लो हुने गरेको छ । अस्पतालमा राखिएको उपस्थिती पुस्तिकामा
सयौं फिल्मकर्मी तथा शाहका शुभचिन्तकले आफ्नो उपस्थिती जनाएको देखिएको छ ।
शाह एक्कासी बिरामी भएपछि उनका शुभचिन्तकसहित परिवार र फिल्मकर्मी चिन्तित
छन् । 'अब डराउनु पर्दैन, ' शाहकी श्रीमती उषाले भनिन् ।
फिल्मीखबर डट कम फिल्म क्षेत्रका महारथी शाहको सिघ्र स्वास्थ्य लाभको कामना गर्दछ ।
No comments:
Post a Comment